Söluferli götulýsingarþjónustu Orku náttúrunnar sem hófst í september er lokið með samningi við Ljóstvista ehf.  Í kjölfar ákvörðunar um að ON hætti að sinna götulýsingarþjónustu var ráðgjafafyrirtækinu Deloitte falið að halda utan um opið söluferli sem nokkur áhugasöm fyrirtæki tóku þátt í, og var því lokið með undirritun samnings við Ljóstvista í dag.

Ljóstvistar ehf er nýstofnað félag í eigu hóps núverandi starfsfólks ON og BB rafverktaka.

„Framundan er vinna við yfirfærslu þjónustunnar frá ON til Ljóstvista með hagsmuni viðskiptavina okkar að leiðarljósi. Sú þekking og reynsla sem býr í Ljóstvistum af götulýsingu og rafverktöku verður mikilvæg í því ferli sem og til framtíðar,“ segir Berglind Rán Ólafsdóttir framkvæmdastýra ON.

Götulýsing Orku náttúrunnar er rekstrareining sem hefur þjónustað sveitarfélög, opinberar stofnanir og einkaaðila í áratugi. Mörg af stærstu sveitarfélögum landsins hafa treyst á þessa þjónustu sem snýr að umsjón með framkvæmd og viðhaldi. Ekki er um að ræða eignarhald á götulýsingu heldur eingöngu þjónustu við eigendur ljósastaura.

Stefnt er að því að reksturinn fari frá ON yfir til Ljóstvista þann 1. mars næstkomandi.

Stafrænt kolefnisspor þessarar fréttar/greinar er áætlað 0,2 til 1,0g CO₂ ígilda á hverja heimsókn.