Hellisheiðarvirkjun
Hellisheiðarvirkjun er staðsett sunnan við Hengilinn og framleiðir heitt vatn og rafmagn. Virkjunin var gangsett árið 2006 og er uppsett afl 200 MW í varmaafli og 303 MW í rafmagni. Í lítrum talið er þetta um 950 lítrar af heitu vatni á sekúndu. Rafmagnið er selt um allt land og heita vatnið sem við framleiðum er notað til hitaveitu fyrir meira en helming höfuðborgarsvæðisins.
Allt umfram jarðhitavatn frá Hellisheiðarvirkjuninni rennur að jafnaði í niðurrennsliskerfi niður fyrir grunnvatnskerfi í jarðhitageyminn. Lofthreinsistöð er staðsett við virkjunina sem að nýtir Carbfix aðferðina til að hreinsa brennisteinsvetni og koltvísýring sem að leyst eru upp í jarðhitavatni og veitt í niðurrennsliskerfi.
Nesjavallavirkjun
Nesjavallavirkjun sem er staðsett norðan við Hengilinn framleiðir heitt vatn og rafmagn. Hún getur framleitt allt að 300 MW í varmaorku sem eru um 1.640 l/sek af heitu vatni og allt að 120 MW af rafmagni.
Andakílsárvirkjun
Andakílsárvirkjun í Borgarfirði hóf rekstur árið 1947. Virkjunin leysti af hólmi vélknúnar rafstöðvar sem notaðar höfðu verið bæði á Akranesi og í Borgarnesi og nálægu dreifbýli og var því mikil umhverfisbót. Vatnsafl er nýtt til að framleiða rafmagn og heildarframleiðslugeta virkjunarinnar er 8 MW.
Í rekstri virkjunarinnar er tekið verulegt tillit til vatnshæðar í Skorradalsvatni og rennslis í Andakílsá í þeim tilgangi að hlúa sem best að Skorradalsvatni sem náttúrusvæðis og Andakílsá sem veiðiá.
Bætt orkunýting – aukin verðmætasköpun
Orka náttúrunnar rekur tvær fullkomnustu jarðhitavirkjanir landsins með tilliti til orkunýtni þar sem bæði rafmagn og heitt vatn er framleitt úr háhitaauðlindinni.
Nýting jarðhita er spennandi verkefni þar sem auðlindin er yfirleitt algjörlega falin í iðrum jarðar og því mikil áskorun að skilja hana og læra að nýta á sjálfbæran hátt. Til þess að nýta auðlindir okkar sem best er gufan þar að auki leidd að gufuhverflum þar sem raforkuframleiðsla fer fram. Rafmagnið okkar er framleitt á sjálfbæran hátt og er kolefnisspor þess með því lægsta sem gerist í heiminum.
Með því að framleiða fleiri orkueiningar í formi raforku og heits vatns úr sama auðlindastraumi þá er unnt að minnka kolefnisspor á hverja orkueiningu. Með bættri orkunýtingu er því ekki aukið né minnkað við losun heldur aukin þau verðmæti sem skapast frá auðlindastraumnum sem veldur losuninni.
Við sinnum þörfum stækkandi samfélags
Jarðhitavirkjanir okkar á Nesjavöllum og Hellisheiði voru byggðar til að mæta auknum þörfum á heitu vatni í samfélaginu. Á virkjanasvæðum okkar eru um 1000-3300 metra djúpar borholur og frá þeim berst vatnsblönduð gufa sem leidd eftir safnæðum í skiljustöð þar sem vatnið er skilið frá gufunni. Vatnið fer í varmastöð og er notað til að hita upp grunnvatn til hitaveitu. Við framleiðum um 50 % af öllu heitu vatni á höfuðborgarsvæðinu sem meðal annars er notað til húshitunar og í sundlaugar. Hugsaðu um okkur næst þegar þú ferð í sund eða sturtu.
Kynntu þér undur jarðhitans
Í Jarðhitagarði ON, staðsettur við Hellisheiðarvirkjun, er fjölbreytt starfsemi sem miðar að því að fullnýta afurðir virkjunarinnar á ábyrgan og umhverfisvænan hátt og skapa þannig aukin verðmæti úr jarðhitanum.
Jarðhitasýningin okkar er staðsett í Hellisheiðarvirkjun og veitir innsýn í virkjun og nýtingu jarðhitans á Íslandi. Á sýningunni er jarðfræði, tækni og saga sett fram á aðgengilegan og skýran hátt með myndum og margmiðlunartækni. Starfsmenn veita upplýsingar og hægt er að fá hljóðleiðsögn um sýninguna.