Sendinefnd undir forystu Yasutoshi Nishimura, Orkumálaráðherra Japans, kom í heimsókn í Hellisheiðarvirkjun Orku náttúrunnar um helgina. Var ráðherrann áhugasamur um starfsemi ON en einnig kynnti Edda Sif Pind Aradóttir framkvæmdastýra Carbfix starfsemi félagsins ásamt Christoph Gebald frá Climeworks.

„Það var afar ánægjulegt að geta sýnt sendinefndinni og ráðherranum starfsemi okkar á Hellisheiði en við höfum átt afar farsælt og gott samstarf við japani í gegnum tíðina. Við erum með túrbínur í okkar virkjunum sem framleiddar eru af japönsku fyrirtækjunum Mitsubishi og Toshiba,“ sagði Berglind Rán Ólafsdóttir framkvæmdastýra ON en hennar síðasta verk sem framkvæmdastýra var að taka á móti hópnum.

„Þau voru áhugasöm um Jarðhitagarð okkar á svæðinu en ON er með mikil áform um að stækka og styrkja starfsemi okkar þar. Ég er afar spennt að fylgjast með því af hliðarlínunni en möguleikarnir í Jarðhitagarðinum er afar miklir.“

Stafrænt kolefnisspor þessarar fréttar/greinar er áætlað 0,2 til 1,0g CO₂ ígilda á hverja heimsókn.