Orkustofnun hefur komist að þeirri niðurstöðu að mælar í hleðslustöðvum Orku náttúrunnar fyrir rafbíla standast kröfur.  

Óvissa hefur ríkt um hvaða kröfur sölumælar í hleðslustöðvum þurfi að uppfylla en samkeppnisaðili okkar óskaði eftir því síðastliðið haust að Orkustofnun rannsakaði búnað sem við notum í okkar hleðslustöðvar. Kvörtunin snéri að því að  mælar í hleðslustöðvum rafbíla þyrftu að uppfylla svokallaða gerðarviðurkenningu sem væri ekki í hleðslustöðvum ON.  

Líkt og fram kemur í þessari frétt Rúv er ljóst að ekki eru skilyrði til þess að gera kröfu um að mælabúnaður í hleðslustöðvum uppfylli umrædda gerðarviðurkenningu. 

Þá er Orkustofnun sammála því mati sem ON hefur haldið fram frá upphafi að einungis mælabúnaður í dreifiveitum þurfi að uppfylla slíkar kröfur en ekki hleðslustöðvar.  

„Það er mikið ánægjuefni að Orkustofnun hafi staðfest það sem við höfum haldið fram frá upphafi að mælar okkar uppfylli þær kröfur sem gerðar eru til hleðslustöðva fyrir rafbíla. Samkeppnisaðili okkar hefur haft uppi stór orð í þessu máli sem hefur m.a. haft áhrif á okkar viðskiptavini sem er miður. Við fögnum þessari niðurstöðu og munum halda áfram að einbeita okkur að því sem skiptir mestu máli, að þjónusta viðskiptavini okkar og flýta fyrir orkuskiptunum okkur öllum til heilla,“ segir Guðrún Einarsdóttir, forstöðumaður Markaðsmála og þjónustu hjá ON.   

Nánar má lesa um niðurstöðu Orkustofnunar hér. 

Stafrænt kolefnisspor þessarar fréttar/greinar er áætlað 0,2 til 1,0g CO₂ ígilda á hverja heimsókn.