Viðskiptaþróun Orku náttúrunnar hefur það hlutverk að hámarka virði þeirra auðlinda sem ON er treyst fyrir á ábyrgan hátt með jöfnun á framleiðslu virkjana ON, orkukaupum og notkun viðskiptavina ON. Teymið samanstendur af sjö öflugum einstaklingum með breiða þekkingu á sviði orkumála en fjórir nýir aðilar komu nýlega inn í teymið sem er leitt af Hjálmari Helga Rögnvaldssyni.

„Tækifærin á raforkumarkaði í dag liggja í þeirri einstöku stöðu sem Ísland er í með 99,98% raforkuframleiðslu sinnar frá endurnýjanlegum orkugjöfum og þeim fjölmörgu nýju og spennandi verkefnum sem eru í pípunum,“ segir Hjálmar Helgi.

Viðskiptavinir ON eru heimili og fyrirtæki í landinu, ásamt stórnotendum og öðrum heildsölum raforku. Hluti af starfsemi viðskiptaþróunar er orkumiðlun sem sér um greiningar og uppbyggingu sviðsmynda fyrir ákvarðanatöku varðandi raforkusölu til framtíðar. Þá tekur sviðið þátt í að móta framtíðarsýn orkuöflunar með ýmsum gagna- og viðskiptagreiningum ásamt því að eiga samtöl við áhugasama orkuframleiðendur.

„Styrkleiki hópsins liggur að mínu mati í breiðum bakgrunni teymisins þar sem ólíkir styrkleikar vinna vel saman. Reynsla hópsins kemur úr ýmsum áttum atvinnulífsins sem nýtist vel í þeim stóru og krefjandi verkefnum sem eru fram undan í orkumálum landsins til framtíðar.“

Hjálmar Helgi segir helstu áskoranir liggja í orkuöryggi til framtíðar, aukinnar orkuöflunar og þeim metnaðarfullu markmiðum stjórnvalda um kolefnishlutleysi fyrir 2040.

Hjálmar hefur starfað hjá Orku náttúrunnar í átta ár en hann er með M.Sc. í rafmagnsverkfræði frá TU Delft í Hollandi og B.Sc. í heilbrigðisverkfræði frá Háskólanum í Reykjavík. Hann segir áhuga sinn á orkumálum hafa kviknað fyrir alvöru í mastersnámi sínu í Hollandi þar sem hann sérhæfði sig í sjálfbærri orkuvinnslu með áherslu á sólar- og vindorku.

„Eftir því sem ég hef unnið lengur í orkumálum þá er ekki hægt að horfa fram hjá því að þau snerta á nær öllum þáttum samfélagsins og hafa gríðarleg áhrif á velsæld okkar og ekki síst hagvöxt þar sem um fjórðungur gjaldeyristekna Íslands byggist á framleiðslu og nýtingu raforku. Minn metnaður liggur í því að hámarka þetta tækifæri fyrir Ísland, til hagsbóta fyrir komandi kynslóðir. Þetta teymi sem við höfum nú sett saman hefur þennan sama metnað og því eru afar spennandi tímar fram undan,“ segir Hjálmar Helgi að lokum.

Hjálmar Helgi Rögnvaldsson leiðir sviðið en hann hefur átta ára reynslu á sviði orkumiðlunar og viðskiptaþróunar hjá ON. Hann er með M.Sc. próf í rafmagnsverkfræði frá TU Delft í Hollandi þar sem hann sérhæfði sig í sjálfbærri orkuvinnslu og B.Sc. próf í heilbrigðisverkfræði frá Háskólanum í Reykjavík.

Stefán Fannar Stefánsson er í hlutverki viðskiptaþróunarstjóra en hann hefur fimm ára reynslu innan ON þar sem hann var áður sölustjóri fyrirtækjamarkaða ON. Stefán Fannar er með MBA frá CBS í Kaupmannahöfn og B.A. próf í stjórnmálafræði frá Háskóla Íslands. Starf viðskiptaþróunarstjóra felst í því að sinna samskiptum við núverandi og nýja viðskiptavini ON á stórnotendamarkaði og þá sérstaklega í því að meta ný áhugaverð viðskiptatækifæri í tengslum við sölu á auðlindastraumum virkjana ON.

Margrét Lilja Hrafnkelsdóttir er nýr viðskiptaþróunarstjóri ON. Hún er með M.Sc. próf í haggreiningu og tölulegum aðferðum frá Stockholm School of Economics, B.Sc. próf í hagfræði frá Háskóla Íslands og próf í verðbréfaviðskiptum. Áður starfaði hún hjá Íslandsbanka um sjö ára skeið og gegndi síðast stöðu fjárfestatengils bankans. Einnig starfaði hún hjá Nordea við lausafjárstýringu. Starf viðskiptaþróunarstjóra felst í því að sinna samskiptum við núverandi og nýja viðskiptavini ON á stórnotendamarkaði og þá sérstaklega í því að meta ný áhugaverð viðskiptatækifæri í tengslum við sölu á auðlindastraumum virkjana ON.

Helga Kristín Jóhannsdóttir er nýr viðskiptaþróunarstjóri Jarðhitagarðs ON en hún kemur til okkar frá Marel þar sem hún var í hlutverki vörustjóra. Helga Kristín er með M.Sc. próf í fjármálum frá IE Business School í Madrid og B.Sc. próf í iðnaðarverkfræði frá Háskóla Íslands. Jarðhitagarður ON er staðsettur við Hellisheiðarvirkjun og hefur það markmið að laða til sín nýsköpunarfyrirtæki sem nýta auðlindastrauma frá virkjuninni og falla inn í sviðsmynd hringrásarhagkerfis.

Hildur Æsa Oddsdóttir er nýr sérfræðingur í orkumiðlun og kemur hún til okkar frá Seðlabanka Íslands þar sem hún starfaði við áhættugreiningar fjármálafyrirtækja. Hún er með doktorspróf í hagnýttri stærðfræði frá Kungliga Tekniska Högskolan í Stokkhólmi, B.Sc. í vélaverkfræði frá Háskóla Íslands og hefur einnig lokið prófi í verðbréfaviðskiptum. Hildur Æsa kemur til ON með mikla reynslu af greiningum og líkanagerð sem nýtist vel við fjölbreyttar greiningar og verkefni á sviði orkumiðlunar.

Einar Vilmarsson er nýr sérfræðingur í orkumiðlun og kemur til ON frá Lotu verkfræðistofu. Áður vann hann sem verkfræðingur hjá ABB í Svíþjóð. Einar er með M.Sc. próf í rafmagnsverkfræði frá TU Delft í Hollandi og B.Sc. próf í heilbrigðisverkfræði frá Háskólanum í Reykjavík og mun sinna fjölbreyttum verkefnum á sviði orkumiðlunar.

Hólmfríður Haraldsdóttir er með M.Sc. próf í orkuverkfræði frá Chalmers tækniháskólanum í Gautaborg og B.Sc. próf í vélaverkfræði frá Háskóla Íslands. Hólmfríður hefur starfað hjá ON í rúm sex ár og sinnir hlutverki sérfræðings í orkumiðlun þar sem hennar hlutverk hefur verið að greina raforkumarkaði og ný viðskiptatækifæri tengd raforkusölu. Hún er einnig verkefnastjóri yfir einu starfandi vetnisframleiðslustöð Íslands, VON í Jarðhitagarði ON.


Jarðhitagarður ON
Eitt af hlutverkum viðskiptaþróunar er að sjá um uppbyggingu Jarðhitagarðs ON og samningagerð tengt raforkusölu og/eða öðrum efnastraumum frá Hellisheiðavirkjun. Jarðhitagarður ON er öflugur vettvangur fyrir jarðvarmatengda nýsköpun, rannsóknir og þróun. Um er að ræða stórt landsvæði við hlið einnar stærstu jarðvarmavirkjunar í heimi. Á svæðinu er búið að skipuleggja lóðir sem henta fyrirtækjum sem vilja nýta sér þá auðlindastrauma sem frá landinu og virkjuninni koma. Má þar helst nefna rafmagn, heitt vatn, skiljuvatn, kalt vatn, gufu og jafnvel vetni. Nú þegar hafa tvö öflug nýsköpunarfyrirtæki með erlendar rætur komið starfsemi sinni fyrir í Jarðhitagarðinum. Annað fyrirtækið er Climeworks sem fangar CO2 úr andrúmsloftinu og nýtir Carbfix aðferðina við förgun kolefnisins í jarðlögum. Hitt fyrirtækið er VAXA sem ræktar örþörunga sem notaðir eru sem fæðubótarefni. Bæði þessi fyrirtæki eru framarlega á sínu sviði og hafa nú þegar vaxið í umfangi í Jarðhitagarðinum. Nýlega var ráðið í hlutverk Viðskiptaþróunarstjóra fyrir Jarðhitagarðinn og felst hlutverkið að tryggja verðmætasköpun, nýta betur auðlindir og stuðla að áframhaldandi nýsköpun og uppbyggingu Jarðhitagarðs ON.


Stafrænt kolefnisspor þessarar fréttar/greinar er áætlað 0,2 til 1,0g CO₂ ígilda á hverja heimsókn.