Orka náttúrunnar tók þátt í Vísindavöku Rannís um nýliðna helgi ásamt Orkuveitunni og öðrum dótturfélögum hennar, Veitum og Carbfix, auk þess sem bæði Jarðhitasýningin og Elliðaárstöð sem heyra undir móðurfélagið voru með. Viðburðurinn tókst afskaplega vel og var aðsókn góð en reiknað er með að tæplega 7.000 manns á öllum aldri hafi heimsótt Vísindavöku í ár.

Það er Rannís sem stendur fyrir Vísindavöku en þar stendur almenningi til boða sannkölluð vísindaveisla þar sem fremsta vísindafólk landsins sýnir og segir frá rannsóknum og nýsköpun á lifandi og gagnvirkan hátt. Starfsfólk Orku náttúrunnar sagði frá starfsemi fyrirtækisins og hvernig rafmagn og heitt vatn er framleitt í virkjunum fyrirtækisins og fræddi gesti um hleðslustöðvar.

Viðburðurinn var virkilega vel heppnaður og skemmtilegur. Áhugi á verkefnum okkar og Orkuveitunnar allrar var mikill hjá gestum og sérfræðingar okkar stóðu sig virkilega vel við að miðla upplýsingum um verkefni, rannsóknir og allskonar nýsköpun sem blómstrar hjá okkur.

Orkuveitan og dótturfélög leggja mikla áherslu á að taka virkan þátt í Vísindavöku til að deila þekkingu sinni um sjálfbæra orku, umhverfisvernd og nýjustu tækni. Okkur finnst mikilvægt að bjóða gestum upp á gagnvirk verkefni og sýningar sem grípa athygli gesta á öllum aldri og gefa þeim tækifæri til að læra um jarðvarmaorku, vatnsauðlindir og nýstárlegar lausnir fyrir grænni framtíð.

Við þökkum Rannís kærlega fyrir að skipuleggja þennan vel heppnaða viðburð og hlökkum til Vísindavöku að ári.