Nú eru 96 hleðslustöðvar komnar í rekstur af þeim 98 sem settar verða upp á fjórtán stöðum í Kópavogi í kjölfar samnings sem Orka náttúrunnar og Kópavogsbær undirrituðu fyrr í haust. Íbúar eru þegar farnir að nýta sér þjónustuna en hleðslustöðvarnar eru staðsettar víða um bæinn, m.a. við skóla, sundlaugar og bókasöfn. Þetta gerir rafbílaeigendum kleift að hlaða bílinn á meðan þeir njóta þjónustu eða sinna vinnu í bænum. Gert er ráð fyrir að síðustu tvær stöðvarnar verði teknar í notkun fyrir áramót.

Stöðug aukning á Hverfahleðslutengjum ON

Með þessum nýju tengjum eru Hverfahleðslutengi ON á landsvísu orðin um 650 talsins, og mun þeim fjölga enn frekar á næstu misserum víða um land.

Aukin rafbílavæðing hefur skapað meiri eftirspurn eftir hleðslustöðvum í Kópavogi, sem og annars staðar. Það var því mikilvægt fyrir bæjarfélagið að bregðast við þessari þróun, tryggja gott aðgengi fyrir rafbílaeigendur og auðvelda um leið skiptin yfir í rafbíla.

Ánægja með samstarfið

Hjá Orku náttúrunnar er mikil ánægja með samstarfið við Kópavogsbæ. Strax hefur komið í ljós að mikil eftirspurn var eftir þessum tengjum, og staðsetningarnar hafa reynst vel valdar. Lögð er áhersla á að velja alltaf staðsetningar sem nýtast rafbílaeigendum vel og bjóða upp á nálægð við aðra þjónustu, eins og íþróttamannvirki og opinbera starfsemi.

Orka náttúrunnar leggur áherslu á að byggja upp öfluga og notendavæna innviði með sjálfbærni og græna orku að leiðarljósi. Samstarfið við Kópavogsbæ er mikilvægur hluti af þeirri vinnu og styður við sjálfbæra framtíð og fjölbreyttar orkulausnir fyrir landsmenn.