Árni Hrannar Haraldsson, framkvæmdastjóri Orku náttúrunnar, var hluti af opinberri viðskiptasendinefnd sem fylgdi Höllu Tómasdóttur, forseta Íslands, í ríkisheimsókn til Noregs í vikunni. Sævar Freyr Þráinsson forstjóri Orkuveitunnar, Sólrún Kristjánsdóttir framkvæmdastýra Veitna, Edda Sif Pind Aradóttir og Hera Grímsdóttir framkvæmdastýra Rannsókna og nýsköpunar hjá Orkuveitunni voru einnig í sendinefndinni.

Heimsóknin stóð yfir í þrjá daga og markmið hennar var að efla tengsl Íslands og Noregs þar sem sérstök áhersla var lögð á græn orkuskipti, nýsköpun og norræna samvinnu.

Viðskiptasendinefndin samanstóð af fulltrúum fjörutíu íslenskra fyrirtækja og tók hún þátt í fundum og öðrum viðburðum með norskum aðilum þar sem meðal annars var fjallað um sameiginlega fleti á sviði endurnýjanlegrar orku og orkuskipta.

„Við áttum fjölmörg góð samtöl um orkumál og mögulegt samstarf milli Íslands og Noregs. Það er ljóst að við eigum margt sameiginlegt þegar kemur að sjálfbærri nýtingu náttúruauðlinda og tækifærin til samstarfs eru víða,“ segir Árni Hrannar.