Fjölmargir háskólanemar sóttu árlegan Orku- og vísindadag sem fram fór í Elliðaárstöð í síðastliðinni viku. Þar kynnti Orka náttúrunnar starfsemi sína eins og móðurfélagið, Orkuveitan, og hin dótturfélögin, Veitur, Ljósleiðarinn og Carbfix gerðu einnig, í þeim tilgangi að kynna fyrirtækin sem framtíðarvinnustað.

Viðburðurinn var virkilega vel heppnaður og lá leið tæplega 700 háskólanema í dalinn sem er metfjöldi. Þar miðluðu sérfræðingar ON fræðslu til gesta og kynntu störf sín sem eru afar fjölbreytt. Einnig var hægt að skoða bæði túrbínulíkan sem og þrívíddarmódel af Hellisheiðarvirkjun þar sem hægt var að fara um alla króka og kima virkjunarinnar auk þess sem boðið var upp á drykki úr gamalli hleðslustöð sem búið var að breyta í drykkjardælustöð.