Landgræðsluhópur Orku náttúrunnar lauk nýverið við að gróðursetja 8000 birkitré í lítt gróin svæði við Hellisheiðarvirkjun.

Landgræðsluhópurinn samanstendur af níu duglegum einstaklingum sem eru í sumarstarfi hjá okkur og því gróðursetti hvert þeirra tæplega um 1000 tré. Markmiðið með landgræðsluskógræktinni er að græða upp birkiskóga en það er góð leið til að binda kolefni og styðja um leið við líffræðilegan fjölbreytileika en birki er náttúruleg tegund á Íslandi.

Orka náttúrunnar leggur ríka áherslu á góðan frágang og landgræðslu á virkjanasvæðum sínum með það markmið að endurheimta landslag og gróður sem líkast því sem var fyrir framkvæmdir. Meðal verkefna landgræðsluhópsins sem starfar öll sumur hjá okkur eru gróðursetning víðigræðlinga, söfnun og dreifing fræslægju og endurheimt á mosaþembum.